Ituo goda 24. febraļī pyrms Latgalīšu kulturys goda bolvys “Boņuks” padūšonys, Latgolys viestnīceibā “GORS” gastēja Pruota spielis “Aļberts”. Bīdreiba “SK Kuorsova” erudicejis i atpyutys nūtykumu reikoi sovā pusī nu jau caturtū godu, bet itei beja pyrmuo vīsuošonuos uorpus dzymtuos vītys. Parosti “Aļbertā” teik izspieleitys vysdažaiduokuos temys, tok šūreiz, latgalīšim tik svareigajam i vierteigajam nūtykumam par gūdu, temys beja pīlāguotys par un ap Latgolu, tuos cylvākim i nūtikšonom.

Smaideigā i pozitivā gaisūtnī, 3 stuņdu garumā 15 komandys ruodieja sovu zynuošonu i veiksmis līmeni.  Spielis gaitā tyka izspālātys 9(nu 13 pīejamuom), pošu daleibnīku izvālātys temys i 1 obigatuo tema – beztēma, kurā peic jautuojumu nūlaseišonys daleibnīkim ir juonūsoka tēmys nūsaukums. Šūraiz tema beja “Gors”. Kotrā temā beja 5 obligatī vaicuojumi i 1 papyldvaicuojums, kas beja breivys izvielis. Organizatori beja pateikami puorsteigti par komandu erudicejis līmeni, kas ari atsaspūguļuoja gola rezultatūs – tī beja gona augsti i ļūti bleivi.

february-24_-2019-78

Par Pruota spieļu “Aļberts brauc gostūs pi Boņuka” uzvareituojim dīzgon puorlīcynūši kļuva rodu komanda “Vīna saime”, aiz sevis atstuojūt komandys “Moseji” i “Žibactenis”. Lai nūsaceitu spieceiguokuos komandys nu 3. leidz 8. vītai, beja napīcīšams izspieleit papyldys kuortu. Prīcej, ka nu kūpejīm 46 daleibnīkim, dažaidu komandu sastuovūs, 12 beja kuorsovīši!

Pazateicūtīs “Aļberta” plošejam draugu i atbaļsteituoju lūkam, pi bolvom tyka piļneigi vysi spielis daleibnīki! Asom prīceigi par vysim lobīm cylvākim i uzjiemiejim, kas atbolsta “Aļbertu” – SIA “Latgales dārzeņu loģistika” jeb Mežvydu tomāti, “Latgolys šmakovka”,  Malnovys maizneica “Dzīles” i saimineica Aina Barsukova, “Annasmuižas tējas” i Anna Danča, Juoņa Šicāna pīmuojis saimnīceiba, žurnals “A12”, “Latgolys studentu centrs”, “Valentīnas Kirsanovas skaistumkopšanas privātprakse”, Kuorsovys nūvoda pošvaļdeiba. Īpašu paļdis sokam Edeitei Husarei i Latgolys viestnīceibai “Gors” par muojeigū uzjimšonu, Vinetai Vilcānei i portalam “Lakuga.lv” par paleidzeibu satura veiduošonā.

 

Uz sasatikšonu 28.aprilī, kod “Aļberts” byus atpakaļ Kuorsovā. Pruoteigam cylvākam vasala mīsa i gors!

Marta Ločmele i Jurs Vuorkaļs
Nūtykuma radeituoji i vadeituoji