Jau tradicionali Kuorsovys vydsškolā Dzymtuos volūdys dīnys pasuokumu ītvorūs teik reikuota Latgalīšu volūdys piecpušdīne ar mierki popularizēt latgalīšu volūdys lītuošonu ikdīnā. Šūgod piecpušdīne nūtyka 31. martā.

Pasoukumu īsuoce Kuorsovys vydsškolys 8.a klasis škoļneica nūskaitūt A.Vējāna dzejūļi „Jūka rindeņis”. Juopībilst, ka Šarlote jau nu pyrmuos klasis kotru godu pīzadoluos dažaidūs skotuvis runys konkursūs – gon latvīšu literaruos volūdys, gon latgalīšu volūdys,  īgiustūt gūdalguotys vītys.

Itū godu pasuokums nūtyka 7. – 8. klašu školānim. Šūreiz školāni pa klašu komandom minēja latgalīšu meiklis, centēs nūskaidruot sanū latgalīšu vuordu nūzeimis, dažaidu agruokūs laiku omotu nūsaukumus latgalīšu volūdā, izdūmuoja un izteiksmeigi nūlaseja pošu sacereitū puorsokys turpynojumu. Arī komandu leidzjutiejim beja aizdavums – krustvuordu meikļis mineišona, kurā školāni atpazyna filmys „Cylvāka bārns” varūņus un nūtykumus. Juoatzeist, lai ari filma ir daudzis reizis skatāta, aizdavums, kai izaruodeja, školānim našķita vīgls.

Školāni ar interesi un aizrauteibu izpiļdeja sagatavotūs aizdavumus, un mes vēļreiz poursalīcynuom, cik skaneiga un boguota ir latgalīšu volūta, un, prūtams, vielātūs,  lai nuokūtnī latgalīšu volūdys runuotuoju skaits kļiust arvīn leluoks.

Ilona Cibuļska, Anita Lele,
latvīšu volūdys školuotuojis